Бүх оддын санал асуулгыг Дуайт Ховард тэргүүлж байна.
Үндэсний сагсан бөмбөгийн холбооны энэ улирлын бүх оддын тоглолт 2 сарын 15-нд Аризона мужийн Финикс хотод болох юм. Бүх оддын тоглолтын санал асуулгыг одоогийн байдлаар Орландо Мэжик багийн төвийн тоглогч Дуайт Ховард тэргүүлж байна. Ховардын хувьд өнгөрсөн жилийн бүх оддын тоглолтын цагариган дээрээс довтлох төрөлд аваргалж байсныг сагсан бөмбөг сонирхогчид мэдэж байгаа. Орландогийн нэр төр болоод байгаа Дуайт Ховард одоогийн байдлаар хөгжөөн дэмжигчдээс 1 сая 421 мянга, 882 санал аваад байна. Харин Лейкерсын хамгаалагч Коби Брайант 1 сая 280 мянга 912 хүний саналаар удаах байранд жагсаж байна. 3-р байранд зүүн бүсийн Кливленд багийн хамгаалагч ЛеБрон Жеймс багтжээ. Түүнд одоогийн байдлаар хөгжөөн дэмжигчид нь 1 сая 259 мянга, 764 хүн саналаа өгөөд байна. Хэрвээ өнөөдөр бүх оддын тоглолтонд оролцох тамирдын санал асуулга зогслоо гэж үзвэл зүүн бүсийн гарааны бүрэлдэхүүнд хамгаалагчаар Майамигийн Дуэйн Уэйд Детройтын Аллен Айверсон төвийн тоглогчоор Орландогийн Двайт Ховард, довтлогчоор Кливлендын ЛеБрон Жеймс, Бостоны Кевин Гарнетт нар багтах байж. Харин баруун бүсийн гарааны 5-д Лос Анжелес Лейкерс багийн хамгаалагч Коби Брайант, Хьюстон Рокетс багийн Трэйси Макгрейди, төвд Хьюстоны Яо Мин, довтлогчоор Сан Антонио багийн Тим Данкан, Финиксын Амайр Стоудамайр нар гарах юм. Энэ нэрлэж байгаа бүрэлдэхүүнд бараг өөрчлөлт орохгүй болов уу гэсэн таамаглал НБА-гийн мэргэжилтнүүд дунд байна. 2008-2009 оны Бүх оддын тоглолтонд оролцох тамирчдын төлөө та бүхэн www.nba.com сайтанд хандан саналаа өгч болох юм.
Post a Comment